Ճարտարապետության և շինարարության Հայաստանի ազգային համալսարանը հայաստանյան բուհերից առաջինն է, որը Ֆրանսիայի Բարձրագույն կրթության և հետազոտությունների գնահատման բարձր խորհրդի (HCERES) և Իսպանիայի Որակի գնահատման և հավատարմագրման ազգային գործակալության (ANECA) կողմից ստացել է եվրոպական ինստիտուցիոնալ միջազգային հավատարմագրում: Բուհի շրջանավարտներին տրվում է պետական դիպլոմ, որը Ֆրանսիայի կառավարության 1994 թ.-ի դեկտեմբերի 5-ի որոշմամբ դիտարկվում է ֆրանսիական դիպլոմներին համարժեք:
ՃՇՀԱՀ-ն ունի 5 ֆակուլտետ, 23 ամբիոն, 27 կենտրոն, որոնց թվում՝ ոլորտում կիրառվող առաջատար սարքավորումներով հագեցած ուսումնագիտական լաբորատորիաներ ու արվեստանոցներ: Համալսարանը համագործակցում է մի շարք երկրների հետ՝ մասնակցելով ուսանողների և պրոֆեսորադասախոսական կազմի փոխանակման ու վերապատրաստման բազմաթիվ ծրագրերի:
Համալսարանի վճարովի համակարգում սովորող ուսանողների համար գործում է ուսման վարձերի զեղչերի ճկուն համակարգ, իսկ բարձր առաջադիմություն ունեցող ուսանողների համար սահմանված են կրթաթոշակներ: Համալսարանում ուսումնառության ընթացքում հիմնական մասնագիտությանը զուգահեռ կարելի է մասնակցել լրացուցիչ անվճար դասընթացների:
Բուհում գործում է Ուսանողական խորհուրդ, որը կազմակերպում է տարատեսակ միջոցառումներ՝ սոցիալական, ուսումնական, սպորտային և ժամանցային: